CAEx Build & Co. «O‘zpromqurilishmateriallari» uyushmasi bilan hamkorlik memorandumini imzoladi
14-oktabr kuni CAEx Build & Co. jamoasi O‘zbekiston qurilish materiallari sanoati korxonalari uyushmasi — «O‘zpromqurilishmateriallari» uyushmasi bilan o‘zaro hamkorlik memorandumini imzoladi. Tomonlar ko‘rgazmaning biznes dasturini birgalikda ishlab chiqish, mahalliy ishlab chiqaruvchilar mahsulotlarini kengroq tanitish hamda O‘zbekiston va xorijiy kompaniyalar o‘rtasida ishbilarmonlik aloqalarini rivojlantirishni maqsad qilgan.
«O‘zpromqurilishmateriallari» uyushmasi sement, ohak, gips, devorbop va tom yopish materiallari, pardozlash va bezak mahsulotlari, gidroizolyatsiya hamda issiqlik izolyatsiyasi materiallarini ishlab chiqaruvchi korxonalarni birlashtiradi. Ushbu soha qurilish uchun mo‘ljallangan 100 dan ortiq turdagi asosiy mahsulotlarni qamrab oladi. Uyushma korxonalarga texnik, iqtisodiy va axborot jihatidan ko‘mak ko‘rsatadi, yangi turdagi mahsulotlarni o‘zlashtirishga yordam beradi hamda xorijiy kompaniyalar bilan hamkorlikni, jumladan, ilg‘or texnologiyalarni joriy etishni qo‘llab-quvvatlaydi.
Hamkorlik doirasida CAEx Build & Co. va «O‘zpromqurilishmateriallari» uyushmasi ko‘rgazmaning biznes dasturini birgalikda shakllantirish ustida ishlaydi. Dasturda O‘zbekiston ishlab chiqaruvchilarining mahsulotlari, qurilish sohasining dolzarb masalalari va bozor talabiga mos yechimlarga alohida e’tibor qaratiladi. Bu mahalliy korxonalarga o‘z imkoniyatlarini professional auditoriyaga namoyish etish, ishlab chiqaruvchilar, yetkazib beruvchilar va sohaning boshqa ishtirokchilari o‘rtasida tajriba almashinuvini rivojlantirish imkonini beradi.
«Biz uchun CAEx Build & Co. shunchaki mahsulotlar namoyish etiladigan maydon bo‘lib qolmasligi muhim. U qurilish sohasi vakillari hamkorlar topishi va biznes uchun real imkoniyatlarni muhokama qilishi mumkin bo‘lgan platforma bo‘lishini istaymiz. “O‘zpromqurilishmateriallari” uyushmasi bilan hamkorlik biznes dasturini tayyorlashda mahalliy ishlab chiqaruvchilarning ehtiyojlarini hisobga olish va O‘zbekiston korxonalari bilan xorijiy kompaniyalar o‘rtasidagi aloqalarni mustahkamlashga yordam beradi. Ko‘rgazmada ishtirok etuvchi kompaniyalar uchun foydali ishbilarmonlik aloqalarini o‘rnatish va rivojlanishning yangi imkoniyatlarini topish muhim», — dedi CAEx operatsion direktori Mehmet Dukkanci.
Hamkorlikning yana bir yo‘nalishi — mahalliy ishlab chiqaruvchilar va xorijiy yetkazib beruvchilar o‘rtasidagi ishbilarmonlik aloqalarini rivojlantirish. «O‘zpromqurilishmateriallari» uyushmasi va Eksportchilar uyushmasi bilan birgalikda CAEx Build & Co. jamoasi qo‘shni mamlakatlar va boshqa bozorlardagi kompaniyalar bilan aloqalarni kengaytirish ustida ishlamoqda. Bu ishlab chiqaruvchilarga o‘z mahsulotlarini potensial hamkorlar va xaridorlarga taqdim etish, xaridlar bo‘yicha mutaxassislar hamda distribyutorlarga esa yangi takliflar bilan tanishish va kelgusidagi hamkorlik uchun yetkazib beruvchilarni topish imkonini beradi.
CAEx Build & Co. 2026 — qurilish materiallari, texnologiyalari va yechimlariga bag‘ishlangan 3-xalqaro ko‘rgazma — 2026-yil 19–21-noyabr kunlari Toshkent shahridagi CAEx ko‘rgazma markazida bo‘lib o‘tadi. Ko‘rgazmada ishlab chiqaruvchilar va yetkazib beruvchilar, savdo va distribyutsiya kompaniyalari vakillari, arxitektorlar, loyihachilar hamda qurilish sohasi mutaxassislari ishtirok etadi.
Tarmoq uyushmalari bilan hamkorlik CAEx Build & Co. ko‘rgazmasining biznes dasturini bozor ehtiyojlariga mos shakllantirish va ishlab chiqaruvchilar, yetkazib beruvchilar hamda professional xaridorlar o‘rtasida bevosita muloqot uchun imkoniyatlar yaratishga xizmat qiladi.
