CAEx va O’zbekiston Eksportchilar assotsiatsiyasi Xalqaro xaridorlar dasturini mustahkamlaydi

Toshkent, 2026-yil 12-avgust. Markaziy Osiyo xalqaro ko’rgazma majmuasi Central Asian Expo Uzbekistan (CAEx) va O’zbekiston Eksportchilar assotsiatsiyasi Hamkorlik memorandumini imzoladilar. Hamkorlikning asosiy yo’nalishlaridan biri CAEx Mebel & Decor, CAEx Build & Co. va CAEx Food & HoReCa ko’rgazmalari uchun xalqaro xaridorlar (buyerlar) dasturini rivojlantirishdan iborat bo’ladi.
Ikki tashkilot ko’rgazma qatnashchilari taklif etayotgan mahsulot va xizmatlarga qiziqish bildirgan xalqaro chakana savdo tarmoqlari, distribyutorlar, importerlar, ulgurji xaridorlar va boshqa professional buyerlarni jalb qilish uchun o’z resurslari va biznes tarmoqlarini birlashtiradilar. Dastur har bir ko’rgazmaning o’ziga xos yo’nalishi va ishtirokchi kompaniyalarning profillariga moslashtirilib, maqsadli B2B uchrashuvlar va yangi biznes aloqalarini o’rnatish uchun imkoniyatlar yaratadi.
«Biz ushbu hamkorlik har ikki tomon uchun ham manfaatli bo’lishini kutmoqdamiz. Bizning maqsadimiz — o’zbekistonlik eksponentlar bilan birgalikda CAEx ko’rgazmalarini rivojlantirish, shuningdek, eksportchilar o’zlarining xalqaro mijozlari va potensial biznes hamkorlarini taklif qilishlari mumkin bo’lgan maydonchani yaratishdir. Oxir-oqibat, biz uchrashuvlar, savdo va biznesni rivojlantirish uchun real imkoniyatlar yaratishni istaymiz», — dedi CAEx bosh direktori Mehmet Dükkancı.
O’zbekiston Eksportchilar assotsiatsiyasi raisi Yorkin Malikov ushbu hamkorlik mahalliy ishlab chiqaruvchilar va eksportchilar uchun qo’shimcha imkoniyatlar yaratishini ta’kidladi:
«Avvalo, ushbu hamkorlikni imkon qadar qimmatli va o’zaro manfaatli qilish ustida ishlayotgan barcha jamoaga o’z minnatdorchiligimni bildiraman. Eng muhimi, bu O’zbekistondagi biznes, xususan, eksportchilarimiz uchun ulkan imkoniyatdir. Birgalikda biz ularning ham ichki, ham xalqaro bozorlardagi eksporti, ishlab chiqarishi va savdosini oshirishga ko’maklashishni maqsad qilganmiz».
Shuningdek, u o’zbekistonlik ishlab chiqaruvchilarni targ’ib qilish va ularning eksport salohiyatini mustahkamlashda xalqaro ko’rgazmalarning rolini alohida ta’kidladi.
«Xalqaro ko’rgazmalarda korxonalarimiz jiddiy e’tiborni jalb qilish va yangi hamkorlar bilan bog’lanish imkoniyatiga ega bo’ladilar. Shuning uchun ham kuchlarni birlashtirish va yagona jamoa bo’lib ishlash juda muhimdir. Birgalikda biz ishlab chiqaruvchilarimiz uchun ko’proq ish qila olamiz, ularning savdo va eksport salohiyatini oshiramiz hamda ko’rgazmalarimizning yanada rivojlanishi va nufuziga o’z hissasimizni qo’shamiz», — deya qo’shimcha qildi Malikov.
Hamkorlik qurilish, mebel va dizayn, oziq-ovqat sanoati va HoReCa kabi CAEx ko’rgazmalarida taqdim etilgan asosiy tarmoqlarni qamrab oladi. Ikki tashkilot xalqaro xaridorlarni jalb qilish, B2B aloqalarni mustahkamlash va o’zbekistonlik kompaniyalarning xalqaro bozorlarga chiqishini qo’llab-quvvatlash yo’lida birgalikda ishlaydi.